ޢާފިޔާ މޫސާ ވ. ޕްރޮސިކިއުޓަރ ޖެނެރަލްގެ އޮފީސް

31 ޑިސެންބަރު 2019 ދުވަހު ކްރިމިނަލް ކޯޓުން ނެރެފައިވާ ޕާސްޕޯޓް ހިފެހެއްޓުމުގެ އަމުރުގެ ދަށުން ސީލައިފް ގްލޯބަލް އިންކް ޕްރައިވެޓް ލިމިޓެޑްގެ ޑިރެކްޓަރުންގެ ބޯޑުގެ މެންބަރުންގެ ޕާސްޕޯޓް ހިފެހެއްޓިއިރު، ވ.ތިނަދޫ، ރެޑްހައުސް ޢާފިޔާ މޫސާގެ ޕާސްޕޯޓުވެސް ވަނީ ހިފަހައްޓާފައެވެ. ޢާފިޔާ މޫސާގެ ޕާސްޕޯޓް ހިފެހެއްޓުމަށް ފުލުހުން ކުރި ދެ ތުހުމަތަކީ އެޗް.ޑީ.ސީ އާއި ސީލައިފް ގްލޯބަލް އިންކް ޕްރައިވެޓް ލިމިޓެޑްއާ ދެމެދު ހުޅުމާލޭގައި 3000 ހައުސިންގ ޔުނިޓު އެޅުމަށް ވެފައިވާ އެއްބަސްވުމެއްގެ ދަށުން އަޅަންޖެހޭ ހައުސިންގ ޔުނިޓް އެޅުމުގެ މަސައްކަތް ފުރިހަމަނުކޮށް މަކަރާ ހީލަތުން ގިނަ ބައެއްގެ އަތުން ގިނަ ޢަދަދެއްގެ ފައިސާ ނަގާފައިވުމާއި، އެ މުއާމަލާތާއި ގުޅިގެން ކްރެޑިޓް ސުއިސްގެ ސައްހަ ނޫން ޕާފޮމަންސް ބޭންކް ގަރަންޓީއެއް އެޗް.ޑީ.ސީއަށް ހުށަހަޅާފައިވުމެވެ. ޕާސްޕޯޓް ހިފެހެއްޓުމުގެ އަމުރު މުރާޖައާކޮށްދިނުން އެދި 17 ފެބުރުވަރީ 2020 ދުވަހު ޢާފިޔާ މޫސާގެ ފަރާތުން ކްރިމިނަލް ކޯޓަށް ހުށަހެޅިއެވެ. އެ ކޯޓުން ނިންމީ ޕާސްޕޯޓް ހިފެހެއްޓުމުގެ އަމުރު ބާޠިލުކުރަންޖެހޭ ސަބަބެއްނެތް ކަމަށެވެ. ކްރިމިނަލް ކޯޓުގައި ޢާފިޔާ މޫސާ ބުނެފައިވަނީ މިއީ މަދަނީ މައްސަލަތަކަކާ ގުޅުންހުރި ތުހުމަތުތަކެއް ކަމަށެވެ. ފުލުހުން ޖަވާބުގައި ބުނެފައިވަނީ މިއީ މަކަރާއި ހީލަތް ހެދުމާއި ރަސްމީ ލިޔުންތަކަށް ބަދަލު ގެނައުމުގެ ތުހުމަތުކުރެވޭ މައްސަލައެއް ކަމަށާއި، ޢާފިޔާ މޫސާ ފިލުމުގެ އިހުތިމާލު އޮތް ކަމަށާއި، ޑިރެކްޓަރުންގެ ތެރެއިން އެކަކު މިހާރުވެސް ފިލާފައިވާ ކަމަށާއި، ރެޑް ނޯޓިސް ނެރެގެންވެސް ހާޒިރުކުރެވިފައިނުވާ ކަމަށެވެ.ކްރިމިނަލް ކޯޓުގެ ނިންމުން ޢާފިޔާ މޫސާގެ ފަރާތުން ދިވެހިރާއްޖޭގެ ހައިކޯޓުގައި އިސްތިއުނާފުކުރުމުން ނިންމާފައިވަނީ ކްރިމިނަލް ކޯޓުގެ ނިންމުމަށް ބަދަލު ގެންނަން ނުޖެހޭ ކަމަށެވެ. މިއީ ހައިކޯޓުގެ ނިންމުން ޤާނޫނާ ޚިލާފުކަމަށް ބުނެ، ޢާފިޔާ މޫސާގެ ފަރާތުން ދިވެހިރާއްޖޭގެ ސުޕްރީމްކޯޓުގައި އިލްތިމާސްކުރުމުން ބެލި މައްސަލައެކެވެ.

1.ޖިނާއީ އިޖުރާއަތުގެ 75 ވަނަ މާއްދާގެ (ރ) ގެ 1 ވަނަ ނަންބަރާއި 2 ވަނަ ނަންބަރުގެ ބޭނުމަށްޓަކައި ޕާސްޕޯޓް ހިފެހެއްޓުމުގެ އަމުރަށް އެދޭ ފަރާތުން ގިރާކުރަންޖެހޭ ހެކީގެ މިންވަރަކީ ކޮބާ؟

2.ޖިނާއީ އިޖުރާއަތުގެ ޤާނޫނުގެ 75 ވަނަ މާއްދާގެ (ރ) ގެ 2 ނަންބަރުގައި ބަޔާންކުރާ "އޭނާ ދިވެހިރާއްޖެ ދޫކޮށް ފިލައިގެންދާން އުޅޭ ކަމުގެ ހެކި ލިބިފައިވުން" ސާބިތުކޮށްދިނުމަށް ބޭނުންކުރެވޭނެ ވަސީލަތްތަކަކީ ކޮބައިކަން؟

ހައިކޯޓުގެ ޙުކުމަށް ބަދަލު ގެންނަން ނުޖެހޭކަމަށް، މައްސަލަ ބެއްލެވި ތިން ފަނޑިޔާރުންގެ އިއްތިފާޤުން