އާދަމް ޝަރީފު ވ. ޕްރޮސިކިއުޓަރ ޖެނެރަލްގެ އޮފީސް
- ޤަޟިއްޔާ ނަންބަރު:
- 2009/SC-A/18
- ނިންމެވި ކޯޓު:
- ދިވެހިރާއްޖޭގެ ސުޕްރީމް ކޯޓް
- ބާވަތް:
- ޖިނާއީ
- ނިމުނު ތާރީޚު:
- 22/02/10
ފަނޑިޔާރުން
އަބްދުﷲ ސައީދު (ރިޔާސަތު)، ޢަބްދުﷲ ޢަރީފު، އަޙުމަދު ފާއިޒު ޙުސައިން
މައްސަލައިގެ ޚުލާސާ
އާދަމް ޝަރީފު އާއި އިތުރު މީހަކު ބައިވެރިވެގެން ޖަމާޢަތް ހަދައިގެން ވައްކަން ކުރުމުގެ ދަޢުވާ އުފުލުނެވެ. ކުށަށް އާދަމް ޝަރީފު އިޢުތިރާފުވެ ތަޙްޤީޤު މަރުޙަލާގައި ބަޔާނެއް ދީފައިވެއެވެ. މައްސަލަ ޝަރީޢަތަށް ހުށަހެޅުމުން ތަޙްޤީޤު މަރުޙަލާގައި އާދަމް ޝަރީފު ވެފައިވާ އިޢުތިރާފުން ރުޖޫޢަވެ ކުށަށް އިންކާރު ކޮށްފައިވެއެވެ. ދައުލަތުން އާދަމް ޝަރީފްގެ މައްޗަށް ދަޢުވާ އުފުލާފައިވަނީ އާދަމް ޝަރީފު ތަޙްޤީޤުގައި ވެފައިވާ އިޢުތިރާފަށް ބާރު ލިއްބައިދޭ ޤަރީނާތަކެއް ހުރުމުންނެވެ. އެއިގެ ތެރޭގައި ވަގަށް ގެންދިޔަކަމަށް ބުނާ ތަކެތި އާދަމް ޝަރީފުގެ އަތުން ފެނިފައިވާއިރު އެ ތަކެތި އާދަމް ޝަރީފުގެ އަތުން ފެނުނު ކަމާއި މެދު އިންކާރު ކޮށްފައިނުވާ ނުވުން ހިމެނެއެވެ. މި މައްސަލައިގައި ދިވެހިރާއްޖޭގެ ހައިކޯޓުން ނިންމަވާފައިވަނީ އާދަމް ޝަރީފު ތަޙްޤީޤުގައި ކިޔައިދިން ވާހަކަތަކުގައި ވައްކަމުގެ ޢަމަލު ހިނގާދިޔަ ގޮތްކަމަށް ކިޔައިދިން ގޮތާއި އާދަމް ޝަރީފާއި އެކު މި ވައްކަމުގައި ބައިވެރިވި ދެވަނަ ފަރާތުން ކިޔައިދިން ކިޔައިދިނުން އެއްގޮތްވުމާއި ވަގަށްނެގި ތަކެތި އާދަމް ޝަރީފުގެ ދަބަހަކުން ފެނިފައިވާތީ ގުޅިފައިވާ ޤަރީނާތަކުގެ މައްޗަށް ބިނާކޮށް އެކަށީގެންވާ ޝައްކެއްނެތް މިންވަރުން ދަޢުވާ ސާބިތުވާކަމުގައެވެ. މިއީ ދިވެހިރާއްޖޭގެ ހައިކޯޓުން އެ މައްސަލަ ނިމުމުން އާދަމް ޝަރީފުގެ ފަރާތުން ދިވެހިރާއްޖޭގެ ސުޕްރީމް ކޯޓުގައި އިލްތިމާސް ކުރުމުން ބެލި މައްސަލައެވެ.
އިޝޫ
1- ތަޙްޤީޤުގައި ވެފައިވާ އިޢުތިރާފުން ޝަރީޢަތުގެ މަޖިލީހުގައި ރުޖޫޢަވެއްޖެނަމަ އެ އިޢުތިރާފުގެ މައްޗަށް ބުރަދަނެއް ދެވިދާނެތޯ؟
ނިންމިގޮތް
ދިވެހިރާއްޖޭގެ ހައިކޯޓުން ނިންމާފައިވާ ނިންމުމަށް ތާއީދުކޮށް.
ކަނޑައެޅުނު އުސޫލު
- ތަޙްޤީޤުގައި ވެފައިވާ އިޢުތިރާފަށް ބާރު ލިއްބައިދޭ ޤަރީނާތަކެއް ހުރިނަމަ ތަޙްޤީޤުގައިވެފައިވާ އިޢުތިރާފަށް ބުރަދަނެއް ދެވިދާނެކަން.
ލެތުން މޯބައިލް އެޕް ހޯއްދަވާ.
