ޕްރޮސިކިއުޓަރ ޖެނެރަލްގެ އޮފީސް ވ. އަޙުމަދު މޫސާ

ވ.ތިނަދޫ، ރެޑްހައުސް، އަޙްމަދު މޫސާގެ މައްޗަށް ދަޢުވާކޮށް ކްރިމިނަލް ކޯޓަށް 2021 ވަނަ އަހަރު ހުށަހަޅާފައިވާ 42 ދަޢުވާއާ ގުޅިގެން އަޙްމަދު މޫސާ ޝަރީޢަތް ނިމެންދެން ބަންދުކޮށްފައިވަނިކޮށް ކްރިމިނަލް ކޯޓުގައި ބޭއްވުނު ބަންދު މުރާޖަޢާކުރުމުގެ އަޑުއެހުމެއްގައި އަޙްމަދު މޫސާ ޝަރުޠުތަކަކާއެކު ދޫކޮށްލިއެވެ. ކްރިމިނަލް ކޯޓުގެ މި އަމުރު ޕީޖީ އޮފީހުން ހައިކޯޓުގައި އިސްތިއުނާފު ކުރުމުން ދިވެހިރާއްޖޭގެ ހައިކޯޓުން ނިންމާފައިވަނީ ޕީޖީ އޮފީހުން އަމުރު އިސްތިއުނާފުކޮށްފައިވަނީ ޖިނާއީ އިޖުރާއަތުގެ ޤާނޫނުގެ 198 ވަނަ މާއްދާގެ (ރ) ގައި ބުނާ އިސްތިއުނާފުކުރުމުގެ މުއްދަތު ހަމަވިފަހުން ކަމަށްވާތީ، މައްސަލަ ކުރިއަށް ނުގެންދެވޭނެ ކަމަށެވެ. މިއީ ހައިކޯޓުގެ ގެ ނިންމުން ބާޠިލް ކަމަށް ކަނޑައަޅައިދިނުމަށް އެދި ޕީޖީ އޮފީހުން ދިވެހިރާއްޖޭގެ ސުޕްރީމްކޯޓުގައި އިލްތިމާސްކުރުމުން ބެލި މައްސަލައެކެވެ.

ޖިނާއީ އިޖުރާއަތުގެ ޤާނޫނުގެ 198 ވަނަ މާއްދާގެ (ރ) ގައި ބުނާ، ދަށު ކޯޓަކުން ނެރެފައިވާ އަމުރެއް ނުވަތަ ޝަރީޢަތުގެ ކުރިން ހުށަހަޅާ ހުށަހެޅުން ހުށަހެޅުމުގެ މަރުޙަލާގައި ކޯޓަކުން ނިންމާފައިވާ ނިންމުމެއް ދައުލަތުގެ ފަރާތުން އިސްތިއުނާފު ކުރާނަމަ 48 ގަޑިއިރު ތެރޭގައި އިސްތިއުނާފު ކުރުމަށް ބުނެފައިވާއިރު މި 48 ގަޑިއިރު ގުނާނީ ކިހިނެއްކަން.

ހައިކޯޓުގެ ޙުކުމް ބާޠިލްކަމަށް ކަނޑައަޅައި، މި މައްސަލަ މައުޟޫއީ ގޮތުން ބަލައި ގޮތެއް ކަނޑައަޅަންޖެހޭ ކަމަށް މައްސަލަ ބެއްލެވި ތިން ފަނޑިޔާރުންގެ އިއްތިފާޤުން.